Na Boka Noti

Na boka noti 
Sol ta kamba
miniz ta brinka roda,
silimbitxibitxi, Kampanada,  pulicia ku ladron…
Vovó Lena xintadu na stera ta kontanu stória
di ti lobu ku xibinhu
//
Na boka noti 
podogó ku kafuka ta limia kaça
balanbuta ta brinka na kanderu
kanderu ku odju kabalu
mama ta poi katxupa na meça
papa ta reza pa pom di kada dia ka falta
//
Na boka noti 
mas grandi ta bai pa beku 
namoru sekretu na sekuro
odju ragaladu ta dá fé
si vizinhas, flanu ou sikilanu

//

É na boka noti 
ki ta bem teson,
ki  mininas ta prenha,
ki papa ta sota manas,
ki xiroti ta salta caça vizinhus

//

Na boka noti 
flanu morri,  txoradu,  podu stera…
dja rezadu pa alma di difuntus
dadu kafé ku bulaxa
bokaboka kumi tudu…
kaló dodu ka atxa nada
//
Na boka noti é tristeza i ligria
é morti, é parodia…
grogu fazi festa;
dja mokadu, djatadu,  kortadu, txoradu…
dja moredu…
Codeçinhu dja korta matxu
povus dja djunta
Codeçinhu ka pegadu
bem kabu xefi ku spada na mo
Codeçinhu nem um sinal…
paxenxa, paxenxa 
korti runhu, farti runhu
moredu na kaminhu…
na boka noti 
na boka noti ki cuças kontisi