Crispin boca di corneta

Si passu é di nhas-nhas
Cara feia, di bioco trocadu
Bariga di boli, cu curason di padja midju
Rostu cra-N qui nem azia di porca di Prisca

Djongotodu, Crispin é santu
Di pé, Crispin é cristu
Dentadu, Crispin é Diôs

Pobu busca, tchocota di dor
Gargalhada di sofrimentu ´
Qui di denti Ca-N ta lembra Morgadu

Ai, miseria na mundu,
Ai pobri di costela mufinu
Ai mancu di pé trocadu
Ai Distinu di fidju parida ´

Crispin é geniu na cantiga di pobu
Crispin é fantochi na rua catchas
Crispin é ligria pa raparigas gozantis
Crispin é asuntu pa rapazis brajeru

Ma, omi di Diôs pamodi?
Si tempu, é fermentu di sociedadi
Si morti, é capataz di pecadoris
Si miséria, é camalion di ignorantis

Lembra qui mundu é ridondu,
Qui sofrimentu é passageru,
Qui confiansa é gritu na cutelu,
Qui ta pobu subi riba lá

Moda Diôs
Na pé di santu
Na procison di cristu
Sconjuru di miseria
Na disconstruson di tchocota
Na armonia di confiansa